O forno da Granxa volve cheirar a pan no Concello de Bande
Resumo do proxecto
Descrición
O Concello de Bande leva a cabo a recuperación do forno tradicional da Granxa, atendendo á demanda da veciñanza de conservar un elemento importante na arquitectura popular do lugar.
O proxecto tivo como obxectivo principal rehabilitar este forno comunitario para garantir a súa conservación e permitir o seu uso en condicións axeitadas de seguridade e salubridade. Trátase dun elemento unido á vida cotiá da aldea, que recupera agora a súa funcionalidade en ocasións especiais como festividades, visitas turísticas ou o uso veciñal puntual.
A actuación consistiu na restauración integral do forno para adecuar as súas condicións para o seu uso. Leváronse a cabo intervencións orientadas a reforzar a súa estabilidade, recuperar os materiais tradicionais e asegurar unha correcta conservación, respectando a súa tipoloxía orixinal.
Esta recuperación permite devolverlle ao forno un papel que perdera co tempo integrándoo tamén como recurso de interese para visitantes. A súa apertura ao público, de forma gratuíta, facilita o acceso tanto á veciñanza como a persoas que se achegan á aldea.
Un forno que volve cheirar a pan
A rehabilitación do forno da Granxa responde á vontade de recuperar espazos que forman parte da memoria colectiva e que teñen un forte valor dentro da memoria da aldea.
O forno está dispoñible para o seu uso por parte da veciñanza: cando existe demanda, coordínase a súa utilización de xeito que, a día de hoxe, funciona coma antigamente.
Ademais, este espazo utilízase en ocasións especiais, como festas populares. Deste xeito, sen querelo, coa súa recuperación tamén se contribúe a reforzar as celebracións e manter vivas as tradicións así como a transmisión de saberes. A apertura do forno tamén o converte nun atractivo para visitantes, que poden coñecer de preto un elemento representativo do rural.
Deste xeito, a recuperación do forno da Granxa exemplifica como a conservación do patrimonio contribúe a xerar novas oportunidades e revalorizar espazos que se deixaron de lado nun momento do pasado. Un proxecto que devolve ao lugar un espazo útil e aínda vivo que aporta moito máis ca o recendo do pan recén feito.
