O proxecto de cooperación Espazos Efémeros, no que participa o GDR10 Limia-Arnoia xunto cos GDR Galicia Suroeste Eurural (coordinador), GDR Oriente de Asturias e a Associação para o Desenvolvimento Sustentável da Região Saloia (Portugal), dá un novo paso no seu percorrido e continúa expandindo a súa rede creativa polo territorio rural da península.
Tras a excelente acollida do primeiro espazo efémero celebrado en Gondomar, o proxecto chega agora a Asturias cunha proposta moi especial: Artesanía Viva, unha instalación artística participativa que terá lugar este sábado 13 de decembro na Benéfica L’Infiestu (Piloña).
Un encontro único para achegarse á creación artesanal
Artesanía Viva reunirá a 15 artesás e artesáns que traballarán en directo, permitindo ao público descubrir de primeira man os procesos creativos, as técnicas, o coidado da materia e o ritmo que se agocha detrás de cada peza. Non se trata dun mercado nin dun espazo de venda, senón dunha oportunidade para conectar coa esencia da artesanía contemporánea e coa identidade cultural do territorio.
O programa inclúe activacións especiais ás 12:30 h e ás 17:30 h, convertendo a xornada nun espazo vivo, dinámico e de encontro entre profesionais, comunidade local e visitantes. A entrada é libre e poderase acceder de 12 h a 18 h.
Un proxecto de cooperación que conecta territorios
Espazos Efémeros é unha iniciativa de cooperación transnacional financiada a través do programa Cooperación Leader – PEPAC 2023–2027, co apoio do FEADER, do Ministerio de Agricultura, Pesca e Alimentación, da Xunta de Galicia e do Principado de Asturias.
O seu obxectivo é explorar novos modelos de activación cultural e comercial no rural mediante a creación de espazos temporais, sostibles e con forte identidade local. A través deles, promóvese o talento creativo, o emprendemento emerxente, a artesanía e o comercio de proximidade.
Para reforzar a difusión da iniciativa, os grupos participantes elaboramos un spot promocional oficial, que xa se pode ver aquí: https://www.youtube.com/shorts/pigoqHmQXRQ
Dende o GDR10 Limia-Arnoia, como entidade colaboradora, celebramos que Espazos Efémeros continúe avanzando e consolidándose como unha rede que une Galicia, Asturias e Portugal a través da creatividade, a cultura e o emprendemento rural.
