No marco do programa Terra de Oportunidades, impulsado por CaixaBank, o GDR Limia-Arnoia organiza tres xornadas formativas dirixidas a persoas emprendedoras, autónomas e empresas do territorio, co obxectivo de achegar ferramentas útiles para avanzar na dixitalización dos negocios e descubrir novas posibilidades para emprender.
As sesións celebraranse os días 23, 26 e 28 de novembro en Celanova, Maceda e Xinzo de Limia, respectivamente. Serán encontros prácticos e participativos nos que as persoas asistentes poderán aprender, compartir experiencias, resolver dúbidas e coñecer recursos que lles axuden a afrontar os retos do seu día a día.
A formación pretende tamén desmontar algúns dos mitos máis habituais arredor da dixitalización e do emprendemento, achegando unha visión próxima e práctica sobre como incorporar novas ferramentas e aproveitar as oportunidades que ofrecen.
Tres encontros para aprender e compartir experiencias
As xornadas desenvolveranse en tres localidades do territorio, co obxectivo de facilitar a participación de profesionais e persoas interesadas en diferentes puntos da comarca.
- A primeira delas terá lugar no Concello de Celanova o luns 23 de novembro, no Salón dos Arcos do Concello de 10.00h a 14.30h.
- A segunda xornada realizarase no Concello de Maceda o xoves 26 de novembro, no Salón de Plenos do Concello de Maceda en horario de tarde de 16.00h a 20.30h.
- Rematarán no Concello de Xinzo de Limia o sábado 28 de novembro, no Salón de Plenos do Concello e en horario de tarde de 16.00h a 20.30h.
Terra de Oportunidades: apoio ao emprendemento no medio rural
O programa Terra de Oportunidades, impulsado por CaixaBank, busca apoiar o emprendemento, favorecer a creación de emprego e contribuír á dinamización económica e social do medio rural. A través desta iniciativa, os Grupos de Desenvolvemento Rural colaboran na identificación e acompañamento de proxectos emprendedores, ofrecendo formación, asesoramento e oportunidades de visibilidade.
O GDR Limia-Arnoia participa neste programa e, na convocatoria de 2026, xa conta con catro proxectos gañadores no seu territorio: As Bestas Rural Box e A Casa Vella, en Allariz; Xogo de Fíos, tamén en Allariz; e Rolling Ax Custom Motorcycles, en Trasmiras. Estas iniciativas representan diferentes formas de emprender no rural, apostando pola innovación, a creatividade e o aproveitamento dos recursos e oportunidades da contorna.
As tres xornadas formativas que agora se organizan en Celanova, Maceda e Xinzo de Limia forman parte deste compromiso co emprendemento local: ofrecer ferramentas prácticas, resolver dúbidas e acompañar tanto a persoas que xa teñen un negocio como a quen está pensando en poñer en marcha unha iniciativa propia.
A iniciativa conta tamén coa colaboración das asociacións de comerciantes e empresarios do territorio: Celanova CHEA; Prolimia, en Xinzo de Limia; e a ACE Maceda.
Inscrición nas xornadas
As persoas interesadas en participar poden inscribirse a través deste formulario.
Para calquera dúbida pódese contactar no correo info@limia-arnoia.gal ou no teléfono 604 09 46 65.
Estas xornadas son unha oportunidade para aprender, compartir experiencias e descubrir novas formas de impulsar os negocios e proxectos profesionais no territorio.
