Acondicionamento dos lavadoiros de Nocelo
Resumo do proxecto
Descrición
O Concello de Baños de Molgas leva a cabo o proxecto de acondicionamento dos lavadoiros de Nocelo, unha intervención centrada na recuperación desta construción tradicional. Esta actuación inclúe tamén elementos asociados como hórreos e un forno, configurando un espazo representativo da vida cotiá no rural de hai uns anos atrás.
Os traballos realizados abarcan actuacións completas de limpeza e desbroce do entorno, así como a retirada de elementos inadecuados incorporados co paso do tempo. Procedeuse á desmontaxe da cuberta existente, á demolición de muros de ladrillo e á eliminación de formigón, recuperando a esencia orixinal do que fora o lavadoiro.
Ademais, executáronse novos pavimentos, unha nova cubrición acorde coa tipoloxía tradicional e revisáronse os sistemas de recollida de augas pluviais. Todo isto acompañado dunha correcta xestión dos residuos xerados.
Recuperar a esencia dos espazos tradicionais
A rehabilitación dos lavadoiros de Nocelo responde á importancia de conservar aqueles lugares que forman parte da memoria da aldea. Estes espazos foron durante décadas puntos de encontro fundamentais, onde se reforzaban as relacións sociais entre a veciñanza.
O proxecto está dirixido tanto ás persoas residentes como a quen visita a zona, ofrecendo un lugar coidado, accesible e integrado na paisaxe seguindo a arquitectura tradicional. Por outra banda, o seu acondicionamento favorece o seu uso como punto de encontro, actividades culturais, rutas, entre outros.
A mellora da contorna tamén ten un impacto positivo desde o punto de vista urbanístico, mellorando espazos degradados non só co paso do tempos, senón debido tamén a reconstrucións e reformas que non tiveron o debido estudo histórico nin a sensibilización coa historia do lugar nin coa harmonía do lugar.
En definitiva, esta actuación permite recuperar un conxunto valor histórico e social, devolvéndolle a súa funcionalidade e dignidade. Un proxecto que ontribúe a construír un rural máis coidado e conectado coa súa historia social.
