Aula de informática e coworking
Resumo do proxecto
Descrición
O Concello dos Blancos decidiu crear unha aula de informática así coma un espazo de coworking para modernizar os servizos na zona. Esta iniciativa busca ofrecer novas oportunidades de acceso á tecnoloxía especialmente a aquelas persoas que non dispoñen dos dispositivos ou da conexión necesaria para realizar determinadas actividades como son os trámites online ou enviar un correo electrónico.
O obxectivo principal do proxecto é facilitar un espazo funcional no que a veciñanza poida formarse, traballar e relacionarse. Ao mesmo tempo, preténdese reducir a fenda tecnolóxica existente, especialmente entre as persoas de maior idade.
A actuación consistiu na adaptación dun espazo como aula de informática e área de coworking. O espazo foi equipado para acoller actividades formativas e laborais.
Un espazo para impulsar a dixitalización
A creación desta aula de informática e coworking responde á necesidade de facilitar a inclusión dixital. A motivación do proxecto céntrase en ofrecer un lugar onde as persoas poidan adquirir novas competencias, conectarse a internet e desenvolver iniciativas propias.
A aula está sendo utilizada especialmente por persoas maiores de 65 anos, favorecendo a aprendizaxe progresiva e o uso autónomo das tecnoloxías. A través de xornadas específicas de formación e outras actividades promóvese a accesibilidade ao ámbito dixital.
Ao mesmo tempo, o coworking ofrece unha oportunidade para que outras persoas usuarias poidan desenvolver o seu traballo nunha contorna compartida, fomentando o intercambio de coñecementos. Este tipo de espazos contribúen a xerar comunidade e a crear sinerxías entre diferentes iniciativas, proxectos e negocios.
