O proxecto SEMTAYR é un dos tres proxectos nacionais aprobados polo Ministerio de Industria, Comercio e Turismo, en relación aos camiños Xacobeos, dentro do Plan de Recuperación, Transformación e Resiliencia, financiado pola Unión Europea a través dos Fondos NextGenerationUE, en Experiencias Turismo España, con 1.499.190,00€.
O obxectivo
Este proxecto abarca catro Camiños Xacobeos oficiais a Santiago de Compostela: Vía Augusta, Camiño Mozárabe, Vía da Prata e Camiño Sanabrés coa intención de mellorar a sinalización, facilitando o seu mantemento e promovendo o atractivo turístico, con especial atención á súa accesibilidade e deste xeito, poder promocionar este histórico recorrido xacobeo. É seguramente o que máis quilómetros ten de todos os camiños Xacobeos, cuns 2.150 quilómetros que pasan por 280 municipios.
SEMTAYR está liderado polo GDR Sierra Morena Sevillana e conta coa participación doutros 30 Grupos de Desenvolvemento e Acción Local de diferentes comunidades autónomas: Andalucía, Extremadura, Castela e León e Galicia, onde se atopa o GDR Limia-Arnoia e ADR Terras de Pontevedra Norte.
Ademais, o proxecto conta coa participación e apoio da Federación Española de Asociacións de Amigos do Camiño de Santiago e das Asociacións provinciais afectadas no seu ámbito de actuación xunto coa Association des amis du Camino Mozarabe de París.
Accións a levar a cabo
Neste senso, haberá accións comúns para todo o ámbito do proxecto e outras individuais no territorio de cada socio:
Comúns
- Evolución da marca.
- Creación dunha plataforma web chamada “Observatorio Camino de Santiago: Vía de la Plata – Camino Mozárabe” e a súa aplicación móbil.
- Plan de comunicación.
Individuais do GDR Limia-Arnoia
No caso do GDR Limia Arnoia, traballamos na elaboración dun informe detallado sobre o estado das fontes nos tramos do Camiño de Santiago que cruzan os concellos de Baños de Molgas, Xinzo de Limia, Sandiás, Trasmiras, Sarreaus, Vilar de Barrio, Xunqueira de Ambía, Taboadela e Allariz. Deste xeito, elabórase un inventario sobre as fontes existentes, avalíase o seu estado de conservación e propóñense medidas para a súa mellora e mantemento, fomentando un uso sostible da auga.
Os pasos a seguir son:
- Rexistrar audiovisualmente con fotografías e vídeos as fontes, que servirá para a elaboración do informe pero tamén para divulgar a importancia destas fontes como parte da nosa identidade.
- Facer unha campaña de sensibilización: “A auga sempre busca o (seu) Camiño”, promovendo o uso responsable da auga e a redución dos plásticos. Con isto animaríase a veciños e peregrinos a non consumir auga embotellada e concienciar sobre a importancia de manter e utilizar as fontes do Camiño de Santiago.
- Propoñer intervencións para garantir a conservación e accesibilidade das fontes.
Camiñar cara a un futuro máis sostible significa coidar a nosa contorna e garantir que os recursos fundamentais, como a auga, sigan sendo accesibles e de calidade. Preservar as fontes é preservar a nosa historia e a nosa relación coa natureza.
