O relevo xeracional é un dos grandes desafíos aos que se enfronta o sector agrario galego. Cada ano son numerosas as explotacións que cesan a súa actividade por falta de continuidade, unha realidade que afecta non só á produción agraria, senón tamén ao mantemento da poboación, da paisaxe e da actividade económica no rural.
Co obxectivo de anticiparse a esta situación e crear novas oportunidades, o proxecto Nó Rural puxo en marcha unha enquisa dirixida a persoas titulares de explotacións agrarias próximas á xubilación.
A finalidade desta iniciativa é identificar aquelas explotacións que poderían necesitar un relevo nos próximos anos e ofrecerlles un acompañamento que facilite a continuidade da actividade mediante a incorporación de novas persoas emprendedoras.
Un cuestionario breve para planificar o futuro
A enquisa, que apenas leva uns minutos completar, permitirá coñecer mellor a situación das explotacións agrarias do territorio e crear unha base de datos que sirva para deseñar actuacións adaptadas ás necesidades reais de cada caso.
A información recollida contribuirá a impulsar medidas que favorezan a transmisión das explotacións, evitando o abandono da actividade agraria e facilitando a incorporación dunha nova xeración de profesionais ao sector.
As persoas interesadas poden cubrir o formulario dende esta ligazón de enquisa sobre remuda.
Desde o GDR Limia-Arnoia animamos tamén a compartir esta información con persoas que estean próximas á xubilación e que poidan estar interesadas en participar.
Un proxecto de cooperación para o futuro rural
Nó Rural é un proxecto de cooperación LEADER que busca impulsar o relevo xeracional no sector agrario galego mediante accións de acompañamento, identificación de oportunidades e colaboración entre os distintos axentes do territorio.
A iniciativa está promovida polos Grupos de Desenvolvemento Rural Limia-Arnoia, Montes e Vales Orientais, Mariñas-Betanzos, Galicia Suroeste, Seitura 22 e Terra Chá.
O obxectivo común é facilitar a continuidade das explotacións agrarias, favorecer a incorporación de novas persoas ao sector e contribuír a construír un rural con máis oportunidades e futuro.
